ABSA YAZINDUA MKOPO MPYA WA MALI ZA KIBIASHARA,SERIKALI YAPONGEZA JITIHADA

Benki ya Absa Tanzania imezindua rasmi huduma mpya ya kifedha inayojulikana kama Mkopo wa Mali za Kibiashara (Commercial Asset Finance – CAF), hatua ambayo imetajwa na Serikali kuwa kichocheo kipya cha maendeleo ya biashara na uchumi wa nchi.

Uzinduzi wa huduma hiyo umefanyika Aprili 4, 2025 jijini Dar es Salaam, ukihudhuriwa na wadau mbalimbali wa sekta ya biashara na fedha. Akizungumza katika hafla hiyo, Naibu Katibu Mkuu wa Wizara ya Viwanda na Biashara, Dkt. Selemani Hassan Serera, alisema CAF ni suluhisho linalokuja kwa wakati muafaka, hasa kwa kuzingatia changamoto zinazowakabili wafanyabiashara wengi nchini.

“Mojawapo ya changamoto kubwa zinazokwamisha biashara ni ukosefu wa mikopo nafuu yenye masharti rafiki. CAF ni huduma itakayosaidia kuongeza uzalishaji, kuimarisha ufanisi, na kuongeza ushindani wa biashara zetu katika soko la kikanda na kimataifa,” alisema Dkt. Serera.

Kwa mujibu wa taarifa ya Absa, huduma ya CAF inalenga kuwawezesha wafanyabiashara kupata mali kama magari ya biashara, mitambo, mashine na vifaa vya kiteknolojia kupitia mikopo yenye masharti nafuu. Mkopo huu unalenga biashara ndogo, za kati na kubwa katika sekta mbalimbali.

Huduma hiyo pia inakuja na mpango wa bima unaolinda mali hizo dhidi ya majanga mbalimbali, hali inayochangia kuimarisha uthabiti wa biashara.

Katika hotuba yake, Dkt. Serera alisema kuwa mpango huo wa Absa unaendana na juhudi za serikali za kuboresha mazingira ya kufanya biashara nchini, ikiwa ni pamoja na urahisishaji wa usajili wa kampuni kupitia mfumo wa BRELA, upatikanaji wa mikopo kupitia taasisi za fedha, pamoja na uwekezaji katika miundombinu muhimu kama barabara na huduma za nishati.

“Serikali inaunga mkono jitihada kama hizi kutoka kwa sekta binafsi. Tunazihimiza taasisi nyingine za fedha kubuni bidhaa bunifu kama hii ili kusaidia maendeleo ya biashara,” aliongeza.

Kwa upande wake, Mkurugenzi Mtendaji wa Absa Tanzania, Obedi Laiser, alisema huduma hiyo ni zao la utafiti wa kina kuhusu mazingira ya kibiashara nchini na inalenga kutoa suluhisho la kweli kwa wateja wa ngazi mbalimbali.

“CAF ni huduma tuliyoiunda tukizingatia hali halisi ya soko la Tanzania. Tunataka kuwawezesha wateja wetu kukua na kufikia malengo yao ya kibiashara,” alisema Laiser.

Katika hafla hiyo, wajasiriamali na wateja wa benki walihimizwa kuchangamkia fursa hiyo kama njia ya kufanikisha ndoto zao za kukuza biashara. Huduma ya CAF tayari imeanza kupatikana katika matawi yote ya Absa nchini.